Maðurinn er grunaður um að hafa numið 13 ára stúlku á brott nýlega og nauðgað henni ítrekað á meðan hann hafði hana í haldi á heimili sínu á Sjálandi. Þetta er mál hinnar 13 ára Filippa sem DV fjallaði nýlega um.
Stórkostleg tíðindi – Filippa fannst á lífi – 32 ára karlmaður handtekinn
Á föstudaginn var Michael Juul Eriksen, lögmaður, skipaður nýr verjandi mannsins en hann mun ekki sinna því starfi. Hann staðfesti þetta í samtali við TV2 á laugardaginn og sagði að nú þegar væri búið að leggja fram beiðni um skipun nýs verjanda. Hann vildi ekki tjá sig nánar um málið.
En Eriksen hefur áður sagt að hann sinni ekki málum þeirra sem eru grunaðir um nauðganir og vörslu eða framleiðslu barnakláms.
„Þeir verða líka að hafa verjanda en það þarf ekki endilega að vera ég,“ sagði hann í samtali við Berlingske í desember á síðasta ári.
„Í hvert einasta sinn sem þú rekur mál er hugsanlegt að sekur aðili sé sýknaður. Það er fórnarkostnaðurinn við að maður sakfellir ekki saklausa. Ég myndi eiga erfitt með slíkt, því ég á erfitt með að lifa með að börn séu þolendur afbrota,“ sagði hann í samtali við TV2 2017.
Eriksen hefur í gegnum tíðina séð um að verja þekkta afbrotamenn fyrir dómi en hann dregur greinilega skýra línu hvað varðar þá sem hann starfar fyrir.
