Halldór Benjamín Þorbergssons framkvæmdastjóri Samtaka atvinnulífsins sagði starfi sínu lausu í lok mars og réð sig í starf forstjóra fasteignafélagsins Regins hf. 

Margir velta því nú fyrir sér hver mun taka við stól Halldórs hjá SA. Í frétt DV í gær voru Svanhildur Hólm Valsdóttir, framkvæmdastjóri Viðskiptaráðs Íslands, Heiðrún Lind Marteinsdóttir, framkvæmdastjóri Samtaka fyrirtækja í sjávarútvegi, Anna Hrefna Ingimundardóttir, starfandi aðstoðarframkvæmdastjóri SA og Jens Garðar Helgason, framkvæmdastjóri fiskeldisfyrirtækisins Laxa nefnd. 

Sjá einnig: Þessi eru nefnd til sögunnar sem eftirmenn Halldórs Benjamíns hjá Samtökum atvinnulífsins

Hringbraut bætir í dag fleiri nöfnum í hattinn sem koma til greina sem arftaki Halldórs. Samkvæmt heimildum Hringbrautar horfa sterkir aðilar innan SA til Jóns Ólafs Halldórssonar, fyrrverandi forstjóra Olís og núverandi formanns Samtaka verslunar og þjónustu. Ingólfur Bender, hagfræðingur og Ólafur Stephensen, framkvæmdastjóri Félags atvinnurekenda, þykja jafnframt góðir eftirmenn Halldórs. 

Eyjólfur Árni Rafnsson, formaður SA, sagði í samtali við Hringbraut í gær að samtökin myndu taka sér tíma og vanda valið á næsta framkvæmdastjóra. Rétti karlinn eða konan yrði fyrir valinu, ekkert liggi á þar sem Halldór Benjamín sé ekki á förum fyrr en í sumar.