Hertogahjónin Harry Bretaprins og Meghan Markle hafa brugðist við afsökunarbeiðni Jeremy Clarkson með harðorðri yfirlýsingu.

Clarkson greindi frá því í dag að hann hefði sent hertogahjónunum afsökunarbeiðni nýlega þar sem hann baðst velvirðingar á ummælum sem hann lét falla í frekar ósmekklegum pistli þar sem hann sagðist leggja fæð og hertogaynjuna og vildi helst sjá hana dregna nakta í gegnum götur Lundúna. Eins baðst hann formlega afsökunar opinberlega í dag á Instagram.

Clarkson sagði þar að orðanotkun hans hafi verið til skammar og hann sæi mikið eftir orðum sínum.

Hertogahjónin segja að Clarkson hafi þó í engu nefnt langvarandi vana sinn að dreifa hatri og hættulegum samsæriskenningum sem og kvenhatri í pistlum sínum.

Í yfirlýsingu hertogahjónanna segir að Clarkson hafi skrifað tölvupóst sem sendur var bara á Harry á jóladag.

„Innihald þess erindis var skráð einkamál og bundið trúnaði. Þó að ný afsökunarbeiðni hafi verið gefin út í dag af herra Clarkson þá er þar í engu minnst á langvarandi vana hans að skrifa greinar sem dreifa hatursáróðri, hættulegum samsæriskenningum og kvenhatri.“

Hertogahjónin segja ljóst að ekki sé um einstakt tilvik að ræða heldur hafi Clarkson gert það að vana sínum að skrifa hatursfulla pistla.

Pistill Clarkson sem um ræddi olli hörðum viðbrögðum og hvöttu þúsundir til þess að Clarkson yrði sviptur vinnunni og ummæli hans fordæmt.