Þegar íbúar í bænum Crookwell í Ástralíu komust að því að Ally Jaffrey, 32 ára kona í bænum, var komin aftur með sjaldgæft krabbamein ákváðu þeir að slá höndum saman og fækka fötum fyrir framan myndavél. Myndirnar sem voru teknar prýða nú nektardagatal sem er til sölu til styrktar Ally og fjölskyldu.
Ally er afar þakklát íbúum bæjarins fyrir framtakið. „Það er fallegt að vera hluti af samfélagi sem er svona umhugað um aðra – það er erfitt að koma því í orð hvernig það er að finna svona beint fyrir því,“ segir hún í samtali við Daily Star.
Það tók ekki langan tíma fyrir samfélagið í bænum að útbúa dagatalið en það var komið úr prenti aðeins fjórum vikum eftir að hugmyndin kom. Scott Butz, sú sem fékk hugmyndina um að gera dagatalið, segir að einungis tveimur sólahringum eftir að henni datt þetta í hug voru 150 íbúar og 56 fyrirtæki í bænum búin að skrá sig til að hjálpa. Butz segir að Ally og eiginmaður hennar Cody séu yndisleg og að þau spili stórt hlutverk í samfélaginu í bænum.
„Ég held að þegar allir vissu af hverju við vorum að gera þetta og fyrir hverja við vorum að gera þetta þá þurfti ekki mikið til að sannfæra neinn,“ segir Butz í samtali við ABC. Þá segir Butz að þetta framtak sýni vel hvað andinn í bænum er góður. „Allir hlaupa undir bagga fyrir hvort annað, styðja við hvort annað, sem er svo frábært.“
