Þórólfur Hilbert Jóhannesson, bróðir mannsins sem lést 23. september árið 1973 í Óshlíð á Vestfjörðum, segir í viðtali við Fréttablaðið að hann viti af fólki fyrir vestan sem hefur upplýsingar um mál bróður síns, Kristins Hauks Jóhannessonar. Þórólfur segist hafa eytt 10-12 tímum alla daga vikunnar í meira en ár í að reyna að upplýsa málið.
„Ég hef varið svona miklum tíma í málið og raun ber vitni vegna þess að ég veit að það er til fólk fyrir vestan, fólk yfir sjötugu, sem veit eitthvað. Þetta fólk þarf bara að þora að opna munninn og setja sig í samband við mig.“
Kristinn lést þegar hann var aðeins 19 ára gamall. Það vakti gífurlega athygli síðasta sumar þegar yfirvöld létu grafa upp líkamsleifar hans en þá höfðu ættingjar Kristins farið fram á endurupptöku lögreglurannsóknar á dauða hans. Í október síðastliðnum greindi lögregla frá því að lögreglustjórinn á Vestfjörðum hefði ákveðið að hætta rannsókn málsins.
„Niðurstaða rannsóknarinnar er sú að ekkert bendi til annars en að farþeginn hafi látist af afleiðingum umferðarslyss. Eins og ávallt er ákvörðun lögreglustjóra um lyktir mála kæranleg til ríkissaksóknara,“ sagði í færslu sem lögreglan á Vestfjörðum birti á Facebook-síðu sinni.
Ættingjar Kristins hafa nú kært ákvörðun lögreglunnar um að taka málið ekki aftur upp. Í viðtali Fréttablaðsins við Kristinn segir hann frá sínum kenningum um málið. Kristinn furðar sig á frásögn leigubílstjórans sem ók bílnum sem valt niður Óshlíðina, honum finnst mörg atriði í frásögn leibubílstjórans ekki standast neina skoðun.
Þórólfur telur að í raun hafi bíllinn aldrei oltið niður hlíðina og vísar í lögregluskýrslu frá 1973 þar sem talað er um hjólför niður hlíðina. Þegar leigubílstjórinn var beððinn um að útskýra hvað olli slysinu sagði hann að vinstra afturhjólið hefði læst en Þórólfur bendir þá á svartar rákir og gúmmítægjur sem fundust á veginum. Hann segir það ríma illa við ökuhraðann sem bílstjórinn segist hafa verið á.
„Það gerist ekki á malarvegi í sex gráðu hita að nóttu til að þú bremsir og það skapist skurður og sjáist gúmmítægjur úti um allan veg.“
Viðtalið við Þórólf má lesa í heild sinni á vef Fréttablaðsins.
