Brotist var inn á verkstæði á Dalvegi í Kópavogi kl. 6 á sunnudagsmorguninn en afhæfi innbrotsþjófanna náðist allt á eftirlitsmyndavélar. Er þeirra nú leitað og vonir standa til að takist að hafa hendur í hári þeirra í dag.

Alexander Kilmak ræddi við DV vegna málsins. „Þjófavarnakerfið fór í gang og þeir flúðu af vettvangi í áttina að Orkunni,“ segir Alexander og staðfestir að þjófarnir hafi ekki náð neinu. „Þeir brutust inn með því að nota gamlan bremsudisk, brutu rúðu og komust inn. Þá fór kerfið í gang og þeir voru ekki lengi að. Fóru beint í peningaskápinn sem var tómur og já, hlupu svo í burtu í áttina að Orkunni.“

Alexander segir að þjófarnir hafi í raun ekki skemmt neitt meira en rúðuna og ekki náð neinum verðmætum með sér. Eins og myndir bera með sér eru andlit þeirra vel hulin en getgátur eru uppi um að annar sé kona en hinn karl. Þeir gætu þó báðir verið karlar.

Alexander er í sambandi við lögreglu vegna málsins. Hann segist telja sig vita hver annar þjófurinn er og segir hann aka á gömlum, rauðum Avensis. Hann segist mögulega fá viðbótargögn um mennina frá Orkunni í dag. Mun hann einnig gefa lögreglu viðbótarupplýsingar um málið í dag. „Ég held ég sé búinn að finna manninn, það gæti verið kona með honum,“ segir Alexander, sem grunar einn einstakling sterklega.

Þess má geta að Alexander er frá Póllandi en hefur búið á Íslandi frá 9 ára aldri og talar reiprennandi íslensku. Hann starfaði sem túlkur hjá Alþjóðasetri Íslands en rekur nú bílaverkstæði. Alexander fjallar um þetta mál á Facebook-síðu sinni.