Ónafngreindur aðili greiddi nýlega 19 milljónir dollara, sem svarar til um 2,5 milljarða íslenskra króna, fyrir hádegisverð með hinum goðsagnakennda bandaríska fjárfesti Warren Buffett. Þetta var árlegt uppboð á hádegisverði með Buffett á vegum eBay og the Glide Foundation sem eru samtök í San Francisco sem berjast gegn fátækt, hungri og heimilisleysi.

Þetta var í tuttugasta og fyrsta sinn sem máltíð með Buffet var boðin upp. Upphafsboðið var 25.000 dollarar en hæsta boðið endaði í 19 milljónum dollara og raunar 100 dollurum betur.

Síðast var máltíð með Buffett boðin upp 2019, hlé var gert á uppboðunum vegna heimsfaraldursins, en þá var hæsta boðið tæplega 4,6 milljónir dollara.

Ekki hefur verið gefið upp hver átti hæsta boðið að þessu sinni. Vinningshafinn dularfulli mun snæða með Buffett og allt að sjö gestum, sem vinningshafinn velur, á Smith & Wollensky Steakhous í New York.

En áður en sterkefnaðir lesendur fara að undirbúa sig undir að bjóða í málsverð með Buffett á næsta ári þá er rétt að taka fram að þetta var í síðasta sinn sem máltíð með honum var boðin upp. Samtals hafa 53 milljónir dollara safnast fyrir the Glide Foundation á þessum uppboðum.