Ben Wallace, varnarmálaráðherra Bretlands, sagði í ræðu hjá National Army Museum að innrás Rússa væri „sjálfseyðandi“ og að flest bendi til að rússneski herinn hafi verið kominn að þolmörkum þegar Rússar réðust inn í Úkraínu þann 24. febrúar. „Rússneskar sprengjuflugvélar, sem hafa hrapað, hafa verið með GPS-tæki límd beint við mælaborðið því þeirra eigin tæki eru svo léleg,“ sagði Wallace.
Hann sagði að „Rússar elski að halda hersýningar til að sýna mikið magn hernaðartækja“ en tækin séu oft svo gömul og úrelt að flugmennirnir fari villur vegar og varpi sprengjum á röngum stöðum.
Í mörgum rússneskum herökutækjum hafa fundist vegakort frá því á níunda áratugnum.
Rússar nota SU-34 flugvélar í Úkraínu. Þær voru upphaflega framleiddar fyrir sovéska herinn í byrjun tíunda áratugarins en eru meðal þeirra flugvéla sem Rússar nota mest í Úkraínu. Hernaðarsérfræðingur Forbes gaf þeim ekki háa einkunn og sagði þær vera svo lélegar, meira að segja nýjustu útgáfurnar, að mikill fjöldi þeirra „hrapi nánast af himninum“ yfir Úkraínu.
Í stríðinu hefur komið í ljós að útbúnaður rússneska hersins er ótrúlega lélegur. Úkraínski herinn hefur birt myndband þar sem rússneskur dróni, sem er notaður til eftirlits, sést og er honum haldið saman með límbandi og bensínlokið er af flösku því upprunalega lokið virðist hafa glatast.
Meðal þess sem rússneskar hersveitir hafa skilið eftir sig þegar þær hafa hörfað undan Úkraínumönnum eru sáraumbúðir sem voru með síðasta notkunardag 1979.
