Breski þingmaðurinn Neil Parish hefur neyðst til að segja af sér sem þingmaður eftir að hann viðurkenndi að hann hefði horft tvisvar sinnum á klám í þingsal. Hann segir að um hafi verið að ræða stundarbilun.

Parish segir að í fyrra skiptið sem hann horfði á klám í þingsalnum þá hafi það verið óvænt og að hann hafi ætlað að horfa á traktora.

„Ég er ekki stoltur af því sem ég var að gera,“ sagði Parish þegar upp komst um það en þá neitaði hann að segja af sér þrátt fyrir áskoranir um það. Hann sagði að hann ætlaði að bíða eftir að málið yrði rannsakað.

Síðar játaði hann seinna skiptið og sagði að það hafi ekki verið óvænt. Þá sagðist hann ætla að segja af sér sem þingmaður.

„Þetta var þannig – það er fyndið en þetta voru traktorar sem ég var að horfa á. Ég fór á aðra vefsíðu sem er með mjög svipuðu nafni en ég horfði á það í smá tíma en ég hefði ekki átt að gera það. Glæpurinn minn, stærsti glæpurinn minn er sá að á öðrum tímapunkti fór ég aftur á síðuna.“

Parish segist ekki hafa verið að horfa á klámið í þeim tilgangi að láta fólk sjá að hann hafi verið að því „Það sem ég gerði var algjörlega rangt. Ég gerði mistök, ég var heimskur. Ég biðst innilegrar afsökunar.“