Manchester United var til umræðu í Íþróttavikunni með Benna Bó á föstudaginn en liðið féll út úr Meistaradeildinni gegn Atletico Madrid í vikunni. Þeir Bjarki Már Elísson og Birkir Már Sævarsson voru gestir í Íþróttavikunni en Bjarki heldur með Liverpool og Birkir með Leeds.
Atletico hægði mikið á leiknum og gerðu allt til að pirra leikmenn Manchester liðsins sem Birkir benti á að væri í raun listform sem Diego Simeone væri búinn að búa til.
„Þetta er óþolandi og ég finn til með Manchester United stuðningsmönnum. Ég var að horfa á þennan leik og ég vonaðist eftir að Manchester myndi skora. Af því ég þoli ekki að horfa á, og ég horfi á marga fótboltaleiki, þegar lið fara í þetta.“
Þeir félagar fóru einnig yfir Marcus Rashford og Harry Maguire sem voru ekki sannfærandi í einvíginu. „Það er eitthvað meir en lítið að þarna. Það sjá það allir. Þetta er frábært lið á pappír en það er eitthvað mikið að,“ sagði Bjarki.
Juan Mata kom inn á fyrir Manchester United og minnti sú skipting á þegar Englendingar þurftu mark gegn Íslandi árið 2016 og Roy Hodgson setti Jack Wilshere inn á. Mata hefur lítið sem ekkert spilað að undanförnu, svipað og þegar Wilshere átti að bjarga Englendingum.
„Í minningunni er Englandsleikurinn ekki sá leikur sem var erfiðastur. Mér fannst við alltaf hafa stjórn á þeim leik. Þegar Wilshere kom inn á þá bara hummaði maður.“
„Það var miklu erfiðara þegar Rashford kom inná. Það var annar handleggur. Það var skipting sem Hodgson átti að gera fyrr,“ sagði Birkir sem spilaði þann eftirminnilega leik.
Nánari umræðu um Meistaradeildina má sjá hér fyrir neðan.