Mikill fjöldi Úkraínumanna er á flótta vegna stríðsins í landinu og glími við þær hörmungar og hrylling sem því fylgir. Nú bætir enn í þjáningar þeirra því Síberíukuldi skall á landinu í gær og er spáð næstu daga. Spáð er allt að 20 stiga frosti að næturlagi. Margar hjálparstofnanir hafa miklar áhyggjur af þessu.

Rauði krossinn hefur til dæmis sent mikið af teppum til landsins síðustu daga og er að koma hitatjöldum upp. Talið er að rúmlega tvær milljónir Úkraínumanna séu á flótta vegna stríðsins og flóttamannastraumurinn er sá mesti í Evrópu síðan í síðari heimsstyrjöldinni. Flestir hafa leitað til Póllands eða rúmlega ein milljón.

Margir eru fluttir til landamæra nágrannaríkjanna á opnum pöllum vörubíla og þurfa því að þola mikinn kulda, bæði frostið og vindkælinguna.