ÍA gat ekki stoppað Jóhannes Karl Guðjónsson þegar KSÍ virkti klásúlu í samningi hann. Jóhannes Karl hætti sem þjálfari ÍA í gær til að gerast aðstoðarþjálfari A-landsliðs karl.

Jóhannes var með samning við ÍA út næsta ár en þegar KSÍ virkjaði klásúlu í samningi Jóhannesar við ÍA gat félagið ekkert gert. Vanda Sigurgeirsdóttir formaður KSÍ hafði samband við Skagamenn fyrir rúmri viku.

„Það var slúður um þetta um daginn, ég fékk erindi fyrir átta dögum frá formanni KSÍ. Formaður KSÍ bað um leyfi til að ræða við Jóa, við veittum það. Þetta var ekki frágengið fyrr en eftir hádegi í gær, við vitum alveg að það sem gerist opinberlega er ekki endilega alltaf það fyrsta,“ sagði Eggert Ingólfur Herbertsson formaður knattspyrnufélagsins ÍA við 433.is í dag.

Eggert segir að Skaginn hafi verið í fimm ára verkefni með Jóhannesi en klásúla hafi verið í samningi hans.

„Við vorum í fimm ára verkefni, það var commitment af beggja hálfu. Það voru tvö tímabil eftir af því, það var klásúla í samningnum sem tók á þessu máli. Það var gengið frá því, við getum ekki stoppað það ef klásúlan var virkjuð.“

Skagamenn þurfa nú að finna eftirmann Jóhannesar en Eggert segir að byrjað sé að ræða málið en engar formlegar viðræður farnar af stað.

„Ég hefði viljað sjá KSÍ fara í þetta í nóvember eða byrjun desember eftir að Eiður Smári lét af störfum. Það eru 83 dagar í fyrsta leik hjá okkur og það munar um hvern dag.“