Brahmdeo Mandal, 65 ára indverskur maður, fékk að minnsta kosti átta skammta af bóluefni gegn kórónuveirunni á síðasta ári. Sjálfur segist hann hafa fengið ellefu skammta. Þessi fyrrum póstmaður segir að bóluefnið hjálpi honum að losna við vöðvaverki og aðra verki og auki almennt heilbrigði hans. Hann segist ekki hafa fundið fyrir neinum aukaverkunum eftir alla þessa skammta.

BBC skýrir frá þessu. Fram kemur að Mondal hafi verið hindraður í að fá það sem hann sagði vera tólfta skammtinn.

Rannsókn er hafin á hvernig Mandal, sem býr í Madhepura, tókst að fá svona marga skammta. Yfirlæknir héraðsins sagði í samtali við BBC að nú þegar liggi fyrir að Mandal hafi tekist að fá átta bólusetningar.

Boðið er upp á bólusetningar á 90.000 stöðum í þessu fjölmennasta ríki heims. Fólk getur bæði pantað sér tíma eða mætt án tímapöntunar.  Fólk þarf að framvísa skilríkjum þegar það mætir í bólusetningu og er upplýsingunum safnað í miðlægan gagnagrunn.

BBC segir að rannsóknin hafi leitt í ljós að Mandal hafi eitt sinn tekist að láta bólusetja sig með hálfrar klukkustundar millibili og voru báðir skammtarnir skráðir í miðlæga gagnagrunninn.