„Gotta catch ´em all,“ er slagorðið fyrir hinn heimsþekkta leik og vörumerki Pokémon. En það þarf stundum að láta einn og einn Pokémon sleppa, að minnsta kosti ef fólk er í vinnunni. Nýlega voru tveir lögreglumenn í Los Angeles reknir úr starfi eftir að þeir höfðu eytt tíma sínum í að eltast við Pokémon í stað þess að eltast við ræningja.

BBC skýrir frá þessu. Það sem hélt lögreglumönnunum svo uppteknum við Pokémon Go var að þeir voru komnir á slóð eins sem heitir Snorlax en hann er að sögn einn af þeim sjaldgæfari í Pokémon Go.

Lögreglumönnunum langaði greinilega svo mikið að ná honum að þeir hunsuðu köll stjórnstöðvarinnar í talstöðinni þar sem beðið var um skjóta aðstoð vegna ráns í verslun. Lögreglumennirnir vísuðu þessu á bug en upptökur úr eftirlitsmyndavél lögreglubílsins komu upp um þá.

Þeir ræddu um aðstoðarbeiðnina sín á milli en ákváðu síðan að hunsa hana því Snorlax var í nágrenninu. Þetta kemur fram á upptökunni sem einnig sýnir að lögreglumennirnir óku á brott frá versluninni og næstu 20 mínútur óku þeir um svæðið og ræddu um Pokémon og eltust við þá í farsímum sínum.

Á upptökunni sést að annar þeirra, að minnsta kosti, náði Snorlax. „Strákarnir verða svo öfundsjúkir,“ sagði hann við hinn lögreglumanninn.

Þetta átti sér stað 2017, þegar Pokémon Go æðið var í algleymingi, og voru lögreglumennirnir reknir í kjölfarið. Þeir reyndu að fá brottrekstrinum hnekkt af dómstólum sem vísuðu málinu frá tvisvar, síðast í síðustu viku.