Það var nóg að gera hjá lögreglunni á höfuðborgarsvæðinu í gærkvöldi og í nótt en alls voru 81 mál skráð. Töluvert var um ökumenn sem voru stöðvaðir vegna aksturs undir áhrifum fíkniefna eða áfengis. Þá var lögreglan kölluð út vegna hávaða alls 11 sinnum í nótt.

Í miðbæ Reykjavíkur í nótt réðust nokkrir menn á einn. Maðurinn sem ráðist var á var með minniháttar áverka eftir árásina en var fluttur á slysadeild Landspítalans til aðhlynningar. Þegar lögreglan mætti á svæðið voru árásarmennirnir farnir af vettvangi.

Leigubílstjóri sem staddur var í miðbænum fékk aðstoð frá lögreglu eftir að ölvaður maður sparkaði í bíl hans en minniháttar skemmdir urðu á bílnum.

í 108 Reykjavík gekk einstaklingur í mjög annarlegu ástandi eftir miðri akbraut í nótt. Lögreglan segir mildi að ekki hafi verið ekið á manninn en hann var óviðræðuhæfur og vildi ekki gefa upp hver hann væri þegar lögregla náði tali af honum. Hann var því vistaður í fangaklefa þangað til það rennur af honum.

Tilkynnt var um líkamsárás í Hafnarfirðinum í gær en þegar lögregla kom á staðinn var árásarmaðurinn horfinn á brott. Minniháttar áverkar voru á brotaþola. Þá var maður rændur í Garðabænum eftir að þrír einstaklingar réðust á hann, höfðu í hótunum við hann og tóku af honum verðmæti.