Aldís Schram hefur falið lögmanni sínum að senda Agnesi Bragadóttur, fyrrum blaðamanni, kröfubréf vegna ummæla Agnesar sem hún lét falla á Facebook síðu Bryndísar Schram, móður Aldísar fyrr í mánuðinum.

Agnes sakaði þar Aldísi um að hafa beitt sig alvarlegu ofbeldi er Aldís lá inni á Landspítalanum.

Í bréfi Gunnars Inga Jóhannssonar hæstaréttarlögmanns sem hann sendi fyrir Aldísar hönd er þess krafist að Agnes biðji Aldísi afsökunar á orðum sínum og að birting á þeirri afsökunarbeiðni fari fram opinberlega, meðal annars á þeim miðlum sem fjölluðu um ummæli Agnesar.

Þá krefst Aldís hálfrar milljónar í miskabætur auk 150 þúsund króna greiðslu vegna lögmannskostnaðar.

Þó nokkrir fjölmiðlar birtu fréttir um skilaboð Agnesar til Bryndísar sem fjölluðu svo til alfarið um Aldísi. Í samtali við DV segist Aldís íhuga stöðu sína gagnvart þeim fjölmiðlum en lýsir sig þó, sem fyrr, reiðubúna til sátta.

Í bréfi Gunnars segir jafnframt að Agnes hafi tíu daga til þess að fallast á kröfu Aldísar, ellegar áskilji hún sér rétt til þess að fara með málið lengra.

Aldís segir í samtali við DV ummæli Agnesar háalvarleg og að um hegningarlagabrot kunni að vera að ræða. Því áskilji hún sér rétt til þess að kæra ummælin til lögreglu.

Gunnar Ingi var einnig lögmaður Aldísar í meiðyrðamáli Jóns Baldvins Hannibalssonar, föður hennar, gegn sér. Það mál var tekið fyrir í Héraðsdómi Reykjavíkur í síðastliðnum febrúar.