Rúmenskur karlmaður hefur verið ákærður fyrir manndráp af gáleysi og fyrir að hafa látið farast fyrir að koma manni til bjargar er Daníel Eiríksson lét lífið á föstudaginn langa, fyrr á þessu ári.
RÚV greinir frá.
„Í ákærunni segir að þegar Daníel féll í jörðina hafi sakborningurinn ekið af vettvangi án þess að huga að honum. Saksóknari telur að með háttsemi sinni hafi hann stofnað lífi og heilsu Daníels í augljósan háska en hann lést á sjúkrahúsi daginn eftir vegna höfuðáverka. Fjölskylda Daníels krefur sakborninginn um 15 milljónir króna í skaða-og miskabætur,“ segir í frétt RÚV.
Ástvinir Daníels hafa oft lýst því yfir í fjölmiðlum að þeir leggi ekki trúnað á að um slys hafi verið að ræða. Gerandinn í málinu komst í fréttir fyrr á árinu er hann rauf farbann. Hann skilaði sér þó til landsins aftur.
Maðurinn hefur ávallt haldið því fram að Daníel hafi látist af slysförum og hann hafi ekki ætlað sér að keyra á hann.
