Í gærdag fór fram síðari umræða um fjármálaáætlun Reykjavíkurborgar og stóð umræðan langt fram á nótt. Þó nokkur hiti var í leikmönnum borgarstjórnar enda er um að ræða síðustu fjármálaáætlun sem afgreidd er fyrir kosningar.
Fulltrúar minnihlutans gerðu sér mat úr efni áætlunarinnar og yfirlýsingum borgarstjóra henni tengdar.
Svo virðist sem yfirlýsingar Dags B. Eggertssonar um að Reykjavík væri í fararbroddi í jafnréttismálum hér á landi hafi hreyft við Hildi Björnsdóttur, varaoddvita Sjálfstæðisflokksins, sem svaraði Degi fullum hálsi í gær.
„Borgarstjóri sagði í ræðu sinni fyrr í dag – að hvert sem litið væri – væri Reykjavíkurborg í forystu. Það er ótrúleg fullyrðing – ekki síst þegar litið er til leikskólamála,“ sagði Hildur og vísaði til sístækkandi biðlista eftir plássi á leikskólum Reykjavíkur.
Sagði Hildur í ræðu sinni:
Árið 2017 voru rúm 800 börn á biðlista eftir leikskólaplássi í Reykjavík. Fjórum árum síðar er fjöldi barna á biðlistum enn næstum 800. Yfir 16 ára tímabil hefur Samfylking lofað öllum börnum leikskólavist við 12-18 mánaða aldur. Meðalaldur barna við inngöngu á borgarrekna leikskóla er hins vegar 29 mánuðir. Illa gengur að stytta biðlista og illa gengur að brúa bilið milli fæðingarorlofs og leikskóla. Nágrannasveitarfélögum gengur hins vegar mun betur að brúa þetta bil.
Hildur rifjaði þá jafnframt upp skerðingu á þjónustu leikskólanna á kjörtímabilinu, en opnunartími leikskóla borgarinnar voru nýverið styttir um hálftíma. „Þá leiðir mönnunarvandi til þess að leikskólar loka gjarnan enn fyrr á daginn – og börn eru send fyrr heim,“ sagði Hildur jafnframt. „Þá eru sumaropnanir einungis tryggðar sumum. Dagforeldrum fækkar ár frá ári. Skólahúsnæði í borginni er illa viðhaldið sem leitt hefur af sér heilsutjón fyrir börn og umfangsmikla röskun á skólastarfi. Staðan er ekki góð. Borgin er ekki í forystu.“
Í þessu ljósi sagði Hildur fullyrðingu borgarstjóra um að Reykjavík væri í forystu í jafnréttismálum „ótrúlega,“ enda eru trygg leikskólapláss fyrir börn eitt mikilvægasta jafnréttismálið sem borgarstjórn fengist við, að hennar sögn.
Sagði Hildur að lokum:
Við þurfum leikskólaþjónustu sem virkar. Borgin þarf að bjóða trausta og áreiðanlega daggæslu eða leikskólavist strax í kjölfar fæðingarorlofs. Jafnframt þarf að styðja við sjálfstætt starfandi leikskóla sem svarað hafa eftirspurn sem borgin hefur ekki getað mætt. Traust aðgengi að leikskólum borgarinnar er nefnilega mikilvægt jafnréttismál – og þar erum við ekki í forystu.
