Love Island-stjarnan Amber Gill harðneitar sögusögnum um að hún hafi verið að hitta Jack Grealish, leikmann Manchester City. Hún sagði frá þessu á Instagram.
Grealish er í fréttum fyrir eitthvað allt annað en afrek sín innan vallar um þessar mundir. Grealish gekk í raðir Manchester City í sumar fyrir 100 milljónir punda. Er hann dýrasti leikmaður í sögu enska fótboltans.
Á síðustu vikum hefur Grealish verið í fréttum fyrir samband sitt við Emily Atack sem er sjónvarpskona í Bretlandi. Grealish og Atack hafa verið að hittast í nokkrar vikur.
Í gær kom það svo fram í enskum götublöðum að á sama tíma hafi hann átt í sambandi við Gill. Hún neitar. Hún segir að fyrirsagnir hafi verið búnar til um sig sem ýjuðu að því að hún hefði sagst vera ,,hin konan.“
,,Ég hef fengið ljót skilaboð og morðhótanir,“ skrifaði Gill. Hún hélt áfram; ,,Ég ákvað að hundsa fyrirsagnirnar en þegar leið á daginn varð ég reiðari og leiðari. Ég ætla ekki að hundsa þetta lengur.“
,,Þessar tvær falsfyrirsagnir um mig hafa orðið til þess að ókunnugir aðilar senda mér ógeðslega ljót skilaboð og hóta mér lífláti, allt af því þeir trúa einhverju bulli sem var skrifað um mig í gær.“
,,Ég hef aldrei og mun aldrei verða hin konan (í lífi Grealish). Ég myndi heldur aldrei segja ,,hin konan“, eins og við séum bikarar fyrir karlmenn.“
Allt þetta hefur komið í fréttirnar á sama tíma og Grealish er í sambandi við Sasha Attwood, sem hefur verið kærasta hans í tæp tíu ár. Samband þeirra hefur ekki alltaf verið dans á rósum.
Sasha er sögð vonsvikin með hegðun Grealish og vill að hann fari að haga sér ef samband þeirra á að ganga upp. Hafa þau haldið neyðarfundi vegna málsins og reyna að leysa hnútinn.