Hannes Þór Halldórsson, fyrrum landsliðsmarkvörður Íslands í knattspyrnu segist auðvitað hafa viljað hætta í landsliðinu við aðrar kringumstæður. Hann sé hins vegar sáttur við sinn landsliðsferil og að hans tími með landsliðinu hafi verið kominn.
Hannes var í viðtali í þættinum Einkalífið, sem birtist á vísi.is á dögunum. Þar greinir hann frá því að hann hafi ætlað sér að hætta eftir leik gegn Englandi í Þjóðadeildinni síðasta haust.
„Ég var næstum því búinn að taka ákvörðun um að hætta eftir að duttum út á móti Ungverjum í umspilinu á hræðilegan hátt. Svo spiluðum við tvo leiki í viðbót. Ég kom inn á móti Englendingum og spilaði þar minn 74. landsleik og jafnaði þar með landsleikjamet Birkis Kristinssonar, vinar míns. Ég hafði horft á það sem markmið lengi og gat alveg sætt mig við að það væri fínt enda þetta svona. Svo fór ég að grenja eftir viðtalið og hélt að þetta væri búið. Ég fór aðeins að gráta í þessu viðtali og fór svo að hágrenja inni í klefanum eftir leik. Ég réði ekki við mig,“ sagði Hannes í þættinum Einkalífið.
Hann hafi hins vegar ákveðið að taka slaginn með landsliðinu í undankeppni HM. Hann sá að það var möguleiki fyrir liðið að komast á sitt þriðja stórmót.
„Maður sá að þetta var riðill þar sem við áttum að taka 2. sætið í. Það voru allir enn með. Þjálfararnir heyrðu í mér og ég ætlaði ekki að sitja heima ef við myndum ná 2. sætinu og komast á HM. Ég ákvað að taka slaginn. Svo þróuðust málin eins og þau þróuðust, bæði innan vallar og utan.“
Hlutir utan vallar áttu eftir að breyta öllu. Ákveðnir landsliðsmenn voru sakaðir um kynferðisofbeldi og tveir leikmenn, þeir Gylfi Þór Sigurðsson og Aron Einar Gunnarsson, sæta nú lögreglurannsókn. Kynslóðaskiptin í landsliðinu hafa átt sér stað hraðar en gert var ráð fyrir.
Hannes segist hafa viljað hætta með landsliðinu í öðrum kringumstæðum en framúrskarandi árangur íslenska karlalandsliðsins síðustu ár féllu í skuggann á alvarlegum ásökunum.
„Auðvitað hefði ég viljað að þetta hefði verið öðruvísi. Ég held að allir séu sammála um það. Þetta er mjög leiðinlegt staða sem er komin upp og vond. Ef maður hefði teiknað það upp hefði það verið allt annað. En þessi staða er komin upp og var komin upp þarna og ég gat engu breytt um það,“ sagði Hannes Þór Halldórsson, fyrrverandi landsliðsmarkvörður Íslands í þættinum Einkalífið.
Hannes lék sinn síðasta landsleik fyrir Íslands hönd gegn Þýskalandi fyrr á þessu ári. Hann er af mörgum talinn einn besti markvörðurinn í sögu íslenska karlalandsliðsins í knattspyrnu.
