Stefán Þór Guðgeirsson, sem er 37 ára gamall, hefur verið ákærður fyrir nauðgun og brot í nánu sambandi. Hann er sagður að hafa á alvarlegan hátt ógnað heilsu og velferð unnustu sinnar í desember fyrir tveimur árum.
RÚV greinir frá.
Stefán Þór hlaut fimm ára fangelsisdóm árið 2012 fyrir hrottafengna nauðgun. Hann fékk síðar reynslulausn en á því tímabili er hann grunaður um að hafa haldið unnustu sinni gegn vilja sínum á heimili hennar og nauðgað henni. Konan kærði Stefán Þór til lögreglunnar á höfuðborgarsvæðinu en dró kæruna svo tilbaka tveimur dögum seinna. Gaf hún þá skýringu að það væri best fyrir hana og hennar fjölskyldu að draga kæruna tilbaka.
Lögreglan hélt þó áfram með málið en ákæra var gefin út í nóvember á síðasta ári. Þinghald málsins er lokað en fram kemur í áðurnefndri frétt RÚV að konan gerir enga miskabótakröfu sem er óalgengt í kynferðisbrotamálum. Ályktun RÚV er sú að það bendi til þess að hún haldi sig við þá frásögn að ekkert brot hafi verið framið.
Nánar er fjallað um málið á vef RÚV
