Alex Þór Hauksson var á skotskónum annan leikinn í röð er hann skoraði sigurmark Öster í sænsku b-deildinni í kvöld.

Alex Þór skoraði í síðasta leik Öster fyrir landsleikjahlé í 2-2 jafnteflinu gegn Brage og var aftur á skotskónum í kvöld er liðið tók á móti Vasalund.

Nicolas Mortensen hafði komið heimamönnum yfir strax á 1. mínútu leiks en Alexander Andue og Nikola Vasic komu Vasalund í 2-1 áður en flautað var til loka fyrri hálfleiks. Matthias Pavic jafnaði svo fyrir heimamenn á 48. mínútu og Alex Þór, sem er miðjumaður að upplagi, skoraði sigurmark heimaliðsins átta mínútum síðar.

Öster er áfram í 7. sæti deildarinnar með 35 stig eftir 25 umferðir. Vasalund situr á botninum með 22 stig.

Tveir aðrir leikir fóru fram í sænsku b-deildinni í kvöld. GIF Sundsvall vann 3-0 sigur á Akropolis á heimavelli og Örgryte og Trelleborg gerðu 2-2 jafntefli.