Hver sem er getur sent inn ábendingu til KSÍ um að landsliðsmaður í knattspyrnu hafi brotið af sér og það er sett í ferli. Sambandið vinnur nú að reglum í kringum slík mál en samskiptaráðgjafi tekur ákvörðunn um málin. Þetta kemur fram í Morgunblaðinu í dag.
Málefni KSÍ og hvað skal gera þegar hugsanleg ofbeldisbrot hafa átt sér stað hafa verið til umræðu síðustu viku. Sagt var frá því í gær að KSÍ hefði sent sex mál til samskiptaráðgjafa.
Allar þær ábendingar höfðu komið frá aðgerðarhópnum Öfgar en um er að ræða sex leikmenn í karlalandsliði Íslands.
„Já eins og staðan er í dag þá virkar þetta þannig,“ sagði Ómar Smárason hjá KSÍ við Morgunblaðið þegar spurt var af því hvort hver sem er gæti sent inn ábendingu og ferlið færi af stað.
Sigurbjörg Sigurpálsdóttir, samskiptaráðgjafi íþrótta- og æskulýðsstarfs fær þá málið á sitt borð og metur stöðu mála. „Að sjálfsögðu vinn ég öll mál í samstarfi við þá sem að málinu koma. Þegar við á fá aðilar upplýsingar um framvindu mála, næstu skref og niðurstöður. Varðandi tímarammann þá er hann mjög misjafn og fer eftir eðli mála,“ sagði Sigurbjörg við Morgunblaðið