Á dögunum greindi Viðskiptablaðið frá velgengni líftækni- og hönnunarfyrirtækisins Vitrolabs sem staðsett er í San Jose í Kaliforníuríki í Bandaríkjunum. Stofnandi og stjórnandi fyrirtækisins er Íslendingurinn Ingvar Helgason en hinn göfugi tilgangur fyrirtækisins er að þróa leður fyrir tískuiðnaðinn sem ræktað er á tilraunastofu. Sú þróun er langt kominn og í áðurnefndri frétt Viðskiptablaðsins kemur fram að virði fyrirtækisins er nú um 11 milljarðar króna.
Ingvar hefur talsverða reynslu af tískuiðnaðinum en hann stofnaði fatamerkið Ostwald Helgason ásamt eiginkonu sinni.
Færri vita að Ingvar á þjóðþekkt systkini sem einnig hafa gert það gott hvert á sínu sviði. Foreldrar Ingvars eru þau Sigrún Davíðsdóttir blaðakona og rithöfundur og dr. Helgi Guðmundsson, prófessor í íslenskum fræðum. Þau Sigrún og Helgi eiga auk Ingvars synina Davíð og Ara Helgasyni.
Davíð er þekktastur fyrir aðkomu sína að tæknifyrirtækinu Unity sem hann stofnaði og byggði upp ásamt viðskiptafélögum sínum. Vöxtur fyrirtækisins hefur verið ótrúlegur og í apríl á þessu ári var greint frá því að Davíð væri kominn á lista Forbes yfir auðugustu menn heims. Alls voru auðæfi hans þá metið á sléttan milljarð bandaríkjadala eða 127 milljarða króna á gengi þess tíma.
Ari er síðan þekktur fjárfestir og hefur unnið náið með bróður sínum Davíð. Hefur milljarðamæringurinn meðal annars látið þau orð falla að Ari sé besti fjárfestir Evrópu.
Bræðurnir þrír eiga síðan samfeðra hálfsystkini sem hafa gert það gott. Annars vegar er það fjölmiðlamaðurinn dáði Egill Helgason og Halla Helgadóttir, framkvæmdastjóri Hönnunarmiðstöðvar Íslands.
