Netárás varð gerð á SaltPay, sem rekur Borgun, í dag, og leiddi það til þess að miklar truflanir hafa víða verið á greiðslukortaviðskiptum. Árásin lýsir sér þannig að netkerfi fyrirtækisins verður fyrir gífurlegu tímabundnu álagi vegna mikils fjölda beiðna úr ólíkum áttum.

Í tilkynningu frá SaltPay segir að vel gangi að bregðast við árásinni. Þá segir enn fremur að ekkert bendi til þess að í árásinni hafi verið komist inn fyrir varnir fyrirtækisins eða yfir viðkvæm gögn:

„Netárás var gerð á SaltPay síðdegis í dag sem varð til þess að talsverðar truflanir hafa orðið á þjónustu fyrirtækisins. Vel gengur að bregðast við árásinni og búist er við að full þjónusta verði komin á að nýju innan skamms. 

Um var að ræða svokallaða dreifða álagsárás eða DDoS-árás sem þýðir að netkerfi fyrirtækisins fær tímabundið yfir sig gríðarlegan fjölda beiðna úr mörgum ólíkum áttum.  

SaltPay biður viðskiptavini sína velvirðingar á þeim truflunum sem árásin hefur valdið í dag. Fyrirtækið hyggst nýta reynsluna sem fékkst af því að verjast árásinni í dag til að efla enn frekar sjálfvirk eftirlitskerfi sín og þannig koma í veg fyrir að sambærilegar árásir valdi truflun á þjónustu í framtíðinni.

Þá vill SaltPay upplýsa að árásin hefur verið tilkynnt til CERT-ÍS, netöryggissveitar Fjarskiptastofu. Fleiri íslensk fyrirtæki hafa orðið fyrir samskonar árásum að undanförnu og upplýsingar um aðferðir árásáraðilana geta mögulega nýst öðrum fyrirtækjum en CERT-ÍS hefur það hlutverk að samhæfa íslenskar varnir gegn tölvuárásum sem þessum. Þá vill SaltPay að lokum taka fram að ekkert bendir til þess að árásaraðilarnir hafi komist inn fyrir varnir fyrirtækisins eða hafi getað nálgast nein gögn.“