Héraðsdómur Norðurlands eystra hefur dæmt karlmann í 30 daga skilorðsbundið fangelsi fyrir líkamsmeiðingar af gáleysi fyrir að hafa ekið á barn á Hörgárbraut á Akureyri. Í dómi er því lýst að maðurinn hafi ekið bifreið sinni yfir gangbraut á móti rauðu gangbrautarljósi með þeim afleiðingum að barn varð fyrir bifreið mannsins.
Barnið slasaðist alvarlega við slysið. Í dóminum yfir manninum segir að barnið hafi hlotið tvö kjálkabrot og afrifinn beinhnúfsklakk, beinflís í mjúkvefjum í andliti, viðbeinsbrot, mar á vinstri lunga og loftbrjóst auk mjaðmagrindarbrots og lærleggsbrot.
Maðurinn játaði sök fyrir dómi, sem fyrr segir, og er sakfelldur sem fyrr segir fyrir líkamsmeiðingar af gáleysi. Í ljósi hreins sakaferils mannsins þótti dóminum rétt að skilorðsbinda refsingu mannsins.
Til viðbótar við skilorðsbundinn fangelsisdóm þarf maðurinn að sæta fjögurra ára sviptingu ökuréttinda og greiða sakarkostnað, sem þó var aðeins 35 þúsund krónur.
Undanfarin ár hafa íbúar kvartað sáran undan ástandi gatnamóta og göngubrauta á Hörgárbraut. Í frétt RUV um málið í febrúar í fyrra sagði að ítrekað hefði verið ekið á fólk við Hörgárbraut. Skipulagsráð Akureyrarbæjar sagðist þá jafnframt harma slysin.
Í september í fyrra sagði DV meðal annars frá því að maður hefði verið dæmdur til þess að greiða konu tvær milljónir í bætur eftir að hafa ekið á konuna og hund hennar á þessum sömu gatnamótum. Þá hafa fjölmörg önnur slys orðið þar á undanförnum árum.
Nú hefur verið gripið til aðgerða. Hafa bæjaryfirvöld sett upp gönguljós á göngugötunni, bætt lýsingu við göngubrautina og sett upp myndavél við gatnamótin.
