Héraðssaksóknari hefur ákært karlmann fyrir kynferðisbrot og kynferðislega áreitni gegn barni með því að hafa í nokkur skipti haft samræði við stúlku er hún var 13 ára á nokkrum stöðum. Þá er maðurinn jafnframt ákærður fyrir að hafa sent henni „í fjölda skipta“ myndir og myndbönd í gegnum fjarskiptatæki og samfélagsmiðla sem sýndu hann á kynferðislegan hátt.

Í ákærunni sem DV hefur undir höndum er eitt myndbandið sérstaklega tiltekið, en þar er hann sagður hafa sýnt af sér ruddalegt, lostugt og ósiðlegt athæfi sem var til þess fallið að særa blygðunarsemi hennar.

Viðurlög við brotum gegn ákvæðum hegningarlaga er varða samræði við börn yngri en 15 ára eru fangelsi ekki skemur en eitt ár og allt að 16 ár.

Héraðssaksóknari krefst þess að maðurinn verði dæmdur til refsingar og greiðslu alls sakarkostnaðar. Þá krefst forráðamaður ólögráða stúlkunnar að maðurinn verði dæmdur til þess að greiða stúlkunni tvær og hálfa milljón króna í miskabætur.