Þann 8. ágúst síðastliðinn kom fram í dagbók lögreglu, sem send er á ritstjórnar allra fjölmiðla, að tilkynnt hefði verið um innbrot í Grafarvogi um kl. 17 daginn áður. Gluggi hafði verið spenntur upp, mikið verið rótað í eigum og verðmætum stolið. Húsráðendur voru erlendis á meðan innbrotinu stóð.
Í dagbók lögreglu kemur enn fremur fram að par eitt væri grunað um innbrotið en það hefði þegar verið handtekið skömmu áður í hverfinu, þar sem fólkið var með bakoka og töskur, og var grunað um þjófnað. Í fórum parsins fundust gögn merkt húsráðendum þar sem brotist hafði verið inn.
Málið er enn í rannsókn lögreglu en húsráðandinn, Guðjón J. Erlendsson, er afar ósáttur við vinnubrögð tryggingafélagsins VÍS í málinu. Hann hefur fengið bréf frá VÍS þess efnis að innbrotið sé ekki talið bótaskylt þar „sem að varúðarreglu um að loka gluggum var brotin,“ eins og segir orðrétt í svari til Guðjóns frá sérfræðingi VÍS.
Guðjón hefur sjálfur ekki fengið að sjá lögregluskýrslu í málinu en telur að augljóst sé að VÍS hafi fengið að sjá skýrsluna og eitthvað í henni hljóti að hafa gefið tryggingafélaginu þær hugmyndir að hann hafi skilið eftir opinn glugga. Það sé hins vegar óhugsandi, hann viti vel sjálfur að hann hafi skilið alla glugga eftir lokaða er hann yfirgaf heimilið og fór til útlanda um þetta leyti.
„Við höfum verið hjá VÍS í 20 ár með heimilistryggingar, innbústryggingu, bílatryggingar og innbúskaskó. Ég hef alla tíð verið með mjög ánægður með viðskiptin hjá VÍS þangað til ég fékk þessa tilkynningu frá þeim, að þeir myndu ekki bæta þetta tjón vegna lögregluskýrslu sem þeir fengu í hendur. Ég hef ekki fengið að sjá nein gögn varðandi innbrotið hjá Vís né lögreglunni, hef ég reynt ítrekað að fá að sjá þessi gögn og mér er sagt frá rannsóknalögreglunni að þetta sé í vinnslu,“ segir Guðjón í samtali við DV.
Sem betur fer hefur Guðjón þó fengið eitthvað bætt því hluti af þýfinu hefur fundist við rannsókn lögreglu og verið komið í hendur hans. Varðandi það þýfi sem ekki hefur fundist verður Guðjón hins vegar óbættur ef svo fer fram sem horfir, þar sem tryggingafélagið viðurkennir ekki bótaskyldu. Er hann mjög ósáttur með það.
