Brynjólfur Þorkell Brynjólfsson, sem skipar 3. sæti Miðflokksins í SV-kjördæmi í komandi alþingiskosningum, vill ekki að Ísland taki á móti flóttafólki frá Afganistan, þrátt fyrir gríðarlega slæmt ástand þar í landi.
Ástæðurnar fyrir því að Brynjólfur vill ekki taka á móti fólki frá Afganistan virðast vera tvær ef marka má pistil hans sem birtist í Morgunblaðinu. Annars vegar segir hann að hér á Íslandi þurfi að bæta og laga velferðarkerfið og heilbrigðiskerfið og hins vegar segir hann að Ísland beri ekki ábyrgð á því sem er að gerast í Afganistan.
„Á sama tíma keppast íslenskir ráðamenn við að kalla yfir sig ábyrgð á því að trúarofstækishópur hafi tekið yfir hið fjarlæga land Afganistan eftir að stærsta herveldi heims heyktist á að halda úti hersveitum sínum þar,“ segir Brynjólfur í pistlinum.
Spyr hvort Íslendingar beri einhverja ábyrgð
Hann segir að atburðarásin í Afganistan hafi verið hraða en fyrirsjáanleg. „Valdabröltið í Afganistan stendur á tímamótum og augljóst að ný öfl og nýjar þjóðir munu nú sigla inn í kjölfarið. Eftir stendur sársaukafull og kostnaðarsöm tilraun við að breyta þjóð sem virðist ekki hafa verið tilbúin að berjast fyrir þessum breytingum sjálf. Gæti verið að heimamenn séu núna þrátt fyrir allt nær því að ráða eigin örlögum?“
Þá kemur Brynjólfur inn á það að ábyrgð Íslendinga á ástandinu í Afganistan sé engin. „Bera Íslendingar einhverja ábyrgð á því hvernig fór eins og ráðherrar ríkisstjórnarinnar keppast við að segja?“ spyr hann.
„Það er erfitt að sjá. Afskipti Íslendinga hafa fyrst og fremst falist í mannúðarstarfi og að veita afgönsku þjóðinni aðstoð við að nútímavæða samfélagið. Starf sem nú virðist koma fyrir lítið. Íslendingar hafa ekki farið með vopnum inn í Afganistan en hafa svarað ákalli um aðstoð, sem meðal annars hefur komið frá heimamönnum, og látið fé af hendi rakna til uppbyggingar.“
„Það er ekkert sem rökstyður það að Íslendingar beri sérstaka ábyrgð“
Að lokum segir Brynjólfur að það sé „fráleitt“ að taka sérstaklega á móti fólki frá Afganistan. „Það er ekkert sem rökstyður það að Íslendingar beri sérstaka ábyrgð á því hvernig fór í Afganistan. Áfram munu þau alþjóðlegu samtök sem hafa starfað þar reyna að aðstoða nauðstadda og vinna að mannúðarmálum. Við Íslendingar eigum að standa við skuldbindingar okkar gagnvart þessum samtökum og aðstoða þau við að hjálpa Afgönum heima við,“ segir hann.
„Það væri fráleit niðurstaða núna að fara að efna til sérstakra fólksflutninga frá Afganistan til Íslands í einhverri keppni ráðherra landsins við að beina sjónum frá því hvernig þeir eru að skilja við íslenska velferðarkerfið. Missum ekki sjónar á því sem skiptir mestu.“
