Lof mitt gengur til Katrínar Jakobsdóttur fyrir að sækja fund um síðustu helgi um fréttaflutning af stríðinu í Sýrlandi þar sem sett var fram gagnrýni á það hvernig fjallað er um stríðið í fréttaveitum Vesturlanda og þar með okkar, og hve hagsmunatengdur þessi fréttaflutningur er NATO, Sádi-Arabíu og bandalagsríkjum þeirra. Forsætisráðherra vildi heyra þessi sjónarmið, ekki til að samþykkja en gaumgæfa.
Last mitt er til þeirra sem túlka komu ráðherra á fundinn sem ámælisverða og þá fyrir það eitt að mæta. Ráðherrann væri þannig að leggja blessun yfir það sem fram kom á fundinum! Þetta eru þöggunartilburðir sem ég hélt að við hefðum fengið nóg af í Íraksinnrásinni og reyndar öllum stríðum síðari tíma þar sem lygarnar komu fram löngu eftir að öll drápin og allar pyntingarnar og hörmungarnar voru yfirstaðnar. Fjölmiðlamenn, það er að segja þeir sem tóku þátt í ómaklegri gagnrýni á forsætisráðherra af þessu tilefni, minntu okkur á hve smáir þeir menn geta orðið sem þó virðist talsverður vindur vera í.
