Guðjón Þórðarson tók nýverið við þjálfun Víkings í Ólafsvík á nýjan leik. Hann þarf að vinna kraftaverk til að bjarga liðinu frá falli. Ráðningin var til umræðu í markaþætti Lengjudeildarinnar á Hringbraut. Þar sagði Hrafnkell Freyr Ágústsson, sérfræðingur þáttarins, Guðjón vera þann ákjósanlegasta í starfið á þessum tímapunkti.

Guðjón stýrði Víkingi einnig seinni hluta síðasta tímabils. Þá endaði liðið í níunda sæti, 7 stigum fyrir ofan fallsvæðið.

Útlitið er öllu svartara núna. Liðið er langneðst í deildinni með 1 stig eftir tíu leiki. Þá eru 8 stig upp í öruggt sæti.

,,Hvaða þjálfara tekurðu ef þú vilt mögulega halda þér uppi? Það eru litlar líkur en smá. Það er Guðjón Þórðarson að mínu mati því hann getur drillað lið varnarlega og náð ótrúlegustu úrslitum, eins og hann hefur gert til dæmis með landsliðið okkar í kringum aldamótin,“ sagði Hrafnkell um ráðninguna á Guðjóni.

Umræðuna um Víking Ólafsvík, sem og markaþátt Lengjudeildarinnar í heild sinni, má sjá hér fyrir neðan.