Daði Freyr Pétursson og liðsmenn hans í Gagnamagninu gerðu sér lítið fyrir og báru sigur úr býtum á Eurovision, söngvakeppni evrópskra sjónvarpsstöðva, sem lauk í Rotterdam rétt í þessu. Eða svona næstum því.
Daði og félagar voru í fimmta sæti eftir kosninguna hjá dómnefndum hinna 39 landa sem kusu með 198 stig. Aðeins einu sinni fékk Ísland fullt hús stiga en það voru Austurríkismenn sem báru ábyrgð á því. Svisslendingar voru í forystu eftir þennan fyrri hluta með 267 stig en á eftir þeim voru Frakkland, Malta og Ítalía.
Alls hlutu Daði og félagar 180 stig í kosningu almennings sem fleytti íslenska framlaginu upp fyrir Möltu og í fjórða sætið. Ítalir báru sigur úr býtum að lokum en framlag hljómsveitarinnar Måneskin, lagið Zitti E Buoni, féll vel í kramið hjá áhorfendum. Þetta er er í þriðja sinn sem Ítalir vinna Eurovision, það gerðist fyrst árið 1964 en seinna skiptið var árið 1990.
Glæsilegur árangur hjá Daða Frey og Gagnamagninu sem voru landi og þjóð til sóma. Um er að ræða besta árangur Íslands undanfarin 12 ár.
