Fundir Anthony Blinkens, utanríkisráðherra Bandaríkjanna, við forseta, forsætisráðherra og utanríkisráðherra Íslands fóru fram í morgun í Hörpunni. Blinken er til Íslands kominn til þess að taka þátt í ráðherrafundi Norðurskautsráðs sem fram fer í Hörpu á morgun og hinn en Blinken nýtti tækifærið og fundaði með íslenskum ráðamönnum í leiðinni. Um er að ræða fyrstu heimsókn bandarísks ráðamanns frá embættistöku Joe Bidens í janúar.

Að loknum fundi þeirra Blinkens og Guðlaugs Þórs Þórðarsonar komu þeir kollegar fram á blaðamannafundi þar sem þeir svöruðu spurningum blaðamanna um samskipti ríkjanna og stöðuna fyrir botni Miðjarðarhafs.

Gríðarlegur viðbúnaður er á meðan á fundahaldinu stendur bæði í Hörpunni og í nágrenni hennar. Lögreglumenn voru á hverju strái fyrir utan bygginguna sem hafði verið girt af. Utan við húsið stóðu liðsmenn sérsveitarinnar, gráir fyrir járnum. Innan veggja Hörpunnar stóðu svo enn fleiri á vakt. Mátti sjá glitta í skildi vopnaðra öryggisvarða Blinkens, en þeir koma úr röðum DSS, eða Diplomatic Security Service. Þeim til halds og trausts voru svo liðsmenn sérsveitarinnar, lögreglunnar og Landhelgisgæslunnar sem stóðu vörð.

Utan við húsið voru svo hraðbátar Landhelgisgæslunnar og varðskip, auk þess sem danska varðskipið HDMS Thetis lá við bryggju í Reykjavíkurhöfn og mátti sjá þyrlu hefja sig til lofts af dekki varðskipsins.

Á morgun bætast svo utanríkisráðherrar hinna Norðurslóðaráðsríkjanna sex. Þeirra á meðal er Sergei Lavrov, utanríkisráðherra Rússa sem mætir til leiks á morgun og má þá búast við að viðbúnaðurinn við Hörpu aukist enn. Verður þetta fyrsti fundir þeirra Blinken og Lavrov.