Benedikt Bóas Hinriksson, blaðamaður á Fréttablaðinu var gestur í þættinum 443.is sem sýndur var á Hringbraut á þriðjudaginn.
Meðal þess sem Benedikt ræddi í þættinum var arfaslök byrjun Breiðabliks í Pepsi-Max deild karla en liðið tapaði sannfærandi á móti KR í 1. umferð deildarinnar um síðastliðna helgi.
Breiðablik var af mörgum spáð Íslandsmeistaratitlinum fyrir mót en frammistaða helgarinnar rennir ekki stoðum undir þá spá.
„Litlu strákarnir í Kópavogi þoldu ekki pressuna. Ef þetta er það sem koma skal þá enda Blikar bara í 7. sæti. Þeir ógnuðu aldrei markinu, ég held að þeir hafi átt eitt skot. Thomas Mikkelsen sem ég myndi glaður vilja hafa í Val, hann er settur út á kant og er ekki með í neinu spili. Ég skil þetta ekki alveg,“ sagði Benedikt í þættinum 433.is.
Óskar Hrafn Þorvaldsson, þjálfari Breiðabliks, tók tapið á sig í viðtali eftir leik og Benedikt segir það virðingarvert.
„En hrós á Óskar Hrafn þjálfara. Hann tók tapið bara á sig en þetta var ekki gott. Þú getur oft tapað leik en tekið eitthvað jákvætt úr honum en hvað var jákvætt við þennan leik Breiðabliks?“
Breiðablik á erfiðan útileik í vændum um næstu helgi er liðið mætir Leikni Reykjavík í Breiðholti. Leiknir, sem eru nýliðar í deildinni eru sýnd veiði en ekki gefin.
„Þeir eiga erfiðan leik í vændum um helgina á móti Leikni í Breiðholtinu, þeir fá ekkert gefins þar,“ sagði Benedikt Bóas Hinriksson, blaðamaður á Fréttablaðinu.
Viðtalið við Benedikt Bóas og þátt 433.is í heild sinni, má sjá hér fyrir neðan:
