Aðdáendur fyrrverandi kryddpíunnar Victoriu Beckham myndu örugglega seint búast við því að sjá hana í Crocs-skóm. En það virðist vera líklegra með hverjum deginum. Bæði vegna þess að vinsældir skónna eru á uppleið og salan á þeim hefur aukist um 64 prósent milli ára, og líka vegna þess að hún fékk Crocs-skó að gjöf frá söngvaranum Justin Bieber.
Justin hannaði eigin Crocs-skó sem seldust upp á örfáum mínútum. Victoria fékk eitt par að gjöf og viðbrögð hennar voru sprenghlægileg.
Hún byrjaði á því að deila mynd af skónum í Instagram Story og þakkaði Justin Bieber kærlega fyrir sig. Hún spurði síðan fylgjendur sína hvort hún ætti að klæðast skónum.
43 prósent svarenda sögðu já en 57 prósent sögðu nei. Victoria deildi niðurstöðunum og skrifaði með: „Það munaði mjóu! Ég held ég myndi frekar deyja en takk samt Justin Bieber.“
Við munum því miður ekki sjá Posh-kryddpíuna klæðast Crocs en hver veit, kannski einn daginn.
