Ísland hóf leik í undankeppni HM í kvöld með útileik gegn Þýskalandi í Duisburg. Leiknum lauk með 3-0 sigri Þjóðverja.

Hér verður farið yfir það góða og slæma í leik íslenska liðsins í kvöld.

Plús +

Albert Guðmundsson, kom inn í staðinn fyrir Rúnar Má á 40. mínútu og kom með ferskleika í íslenska liðið.

Þrátt fyrir erfiða byrjun er eitt sem virðist aldrei hverfa úr íslenska liðinum, baráttan.

Íslenska liðið kom ákveðnara til leiks í upphafi síðari hálfleiks, hélt boltanum betur innan liðsins og pressan hjá liðinu virkaði betur.

Þetta er upphafið á þjálfaratíð Arnars Þórs Viðarssonar með íslenska karlalandsliðið, undirbúningur hefur ekki verið eins og hann er venjulega. Liðið er nú að spila eftir nýjum áherslum og mun vonandi slípast fljótt saman.

Mínus – 

Íslenska liðið mætti ekki tilbúið til leiks, staðan var orðin 2-0 fyrir Þýskaland eftir 7 mínútna leik. Hápressa íslenska liðsins var ekki að skila sínu gegn háhraða leikmönnum Þýskalands.

Hörður Björgvin og Birkir Bjarnason gerðu sig seka um að stíga ekki upp með varnarlínu íslenska liðsins í fyrsta marki leiksins sem kom á 2. mínútu. Það gerði Gnabry réttstæðan og hann kom boltanum á Goretzka sem þakkaði pent fyrir gjöfina.

Martraðarbyrjun Íslands í Duisburg. Leon Goretzka kemur Þýskalandi yfir eftir rúmlega tveggja mínútna leik. Það verður að gefa Þjóðverjum það að þetta var huggulegt mark. pic.twitter.com/pcLfIeZoYu

— RÚV Íþróttir (@ruvithrottir) March 25, 2021

Aftur gerði íslenska liðið mistök, nú í aðdraganda annars marks Þjóðverja. Rúnar Már átti lélega sendingu á miðjum vallarhelmingi sem Þjóðverjar komust inn í. Út frá því hófst laglegt samspil heimamanna sem endaði með marki.

Martraðarbyrjun Íslands í Duisburg. Leon Goretzka kemur Þýskalandi yfir eftir rúmlega tveggja mínútna leik. Það verður að gefa Þjóðverjum það að þetta var huggulegt mark. pic.twitter.com/pcLfIeZoYu

— RÚV Íþróttir (@ruvithrottir) March 25, 2021

Rúnar Már Sigurjónsson, fór meiddur af velli á 40. mínútu. Það er óljóst á þessari stundu hversu alvarleg meiðslin eru en landsliðshópurinn má ekki við frekari skakkaföllum í þessu landsliðsverkefni. Arnar hefur ekki kallað inn aukamannskap hingað til, gerir hann það núna?

Þýska liðið var bara nokkrum númerum of stórt fyrir það íslenska í dag. Fjarvera lykilmanna á borð við Gylfa Þór, Jóa Berg og Alfreð,  hefur einfaldlega of mikið að segja í svona leikjum.