Tveimur leikjum af þremur er lokið í ensku úrvalsdeildinni í kvöld. Burnley og Leicester City gerðu jafntefli og Sheffield United vann sinn þriðja sigur á tímabilinu er liðið hafði betur gegn Aston Villa.
Sheffield United tók á móti Aston Villa á heimavelli sínum, Bramall Lane. Leikurinn endaði með 1-0 sigri Sheffield United.
Eina mark leiksins kom á 30. mínútu, það skoraði David McGoldrick eftir stoðsendingu frá George Baldock.
Sheffield er eftir leikinn í neðsta sæti deildarinnar með 14 stig, tólf stigum frá öruggu sæti í deildinni. Aston Villa er í 9. sæti með 39 stig.
Þá tók Burnley á móti Leicester City á Turf Moor. Leikurinn endaði með 1-1 jafntefli. Jóhann Berg Guðmundsson, var ekki í leikmannahóp Burnley en hann er að jafna sig af meiðslum.
Matej Vydra kom Burnley yfir með marki á 4. mínútu leiksins. Þannig stóðu leikar allt þar til á 34. mínútu þegar að Kelechi Iheanacho jafnaði metin fyrir Leicester City með marki eftir stoðsendingu frá Wilfred Ndidi.
Burnley er eftir leikinn í 15. sæti deildarinnar með 29 stig. Leicester er í 3. sæti með 50 stig.
Sheffield United 1 – 0 Aston Villa
1-0 David McGoldrick (’30)
Burnley 1 – 1 Leicester City
1-0 Matej Vydra (‘4)
1-1 Kelechi Iheanacho (’34)
