Greint var frá því í gær að íslenskur knattspyrnumaður væri grunaður um stórfelldan þjófnað og að málið væri til rannsóknar hjá lögreglu. Félag knattspyrnumannsins og lögreglan staðfestu það í samtali við DV.
Í fréttinni í gær var aðeins fjallað um að knattspyrnumaðurinn hafi verið að verki en nú hefur komið í ljós að hann var ekki einn að verki, samkvæmt heimildum DV voru hið minnsta tveir í viðbót með í för og hafa þeir verið yfirheyrðir af lögreglu vegna málsins. Tekið skal fram að þeir menn tengjast ekki knattspyrnufélaginu né íþróttinni á neinn hátt.
Mönnunum er gefið að sök að hafa rænt heildverslun með úr á höfuðborgarsvæðinu og tekið úr sem metin eru á nokkrar milljónir.
Meira:
Íslenskur knattspyrnumaður grunaður um stórfelldan þjófnað
Atvikið átti sér stað fyrir nokkum vikum en samkvæmt heimildum DV var kúbein notað til að spenna upp hurðina á heildversluninni. Fjöldi myndavéla var á svæðinu sem kom upp um mennina, sem fóru með þýfið á brott og í geymslu á höfuðborgarsvæðinu samkvæmt heimildum DV.
Knattspyrnumaðurinn sem er rúmlega tvítugur lék á annan tug leikja í Pepsi Max deild karla síðasta sumar. Leikmaðurinn hefur leikið fyrir nokkur félög hér á landi og oftar en ekki staðið sig vel.
Lögreglu tókst að hafa upp á mönnunum eftir að myndir náðust af bifreið sem þeir notuðu í ráninu. Umræddur bíll var skráður á félagið sem knattspyrnumaðurinn leikur með og þannig kom málið á borð þeirra.
„Höldur á bílinn, félagið leigði bílinn, maðurinn var með bílinn í sinni umsjón,“ sagði framkvæmdastjóri knattspyrnudeildar félagsins í samtali við DV í gær.