Nordic Entertainment Group (NENT Group), stærsta streymisveita á Norðurlöndum, mun sýna landsleiki á vegum Knattspyrnusambands Evrópu í beinni útsendingu í gegnum Viaplay á Íslandi frá og með keppnistímabilinu 2022-2023. Sex ára tímamótasamkomulag þess efnis nær til 60 íslenskra landsleikja, en samtals verður meira en 1200 leikjum streymt á Viaplay. Þetta er í fyrsta sinn í sögunni sem UEFA gerir einkaréttarsamning við streymisveitu.
Strákarnir okkar – íslenska landsliðið í knattspyrnu – eru stolt þjóðarinnar á íþróttasviðinu og hafa komist á tvö af síðustu þremur stórmótum. Ekkert landslið í heiminum á dyggari stuðningsmenn, en 99,8% þjóðarinnar fylgdust með þegar Ísland lagði England að velli á Evrópumótinu 2016.
Þegar íslenska landsliðið hefur leik í Þjóðadeildinni 2022 og í undankeppni EM 2024 geta íslenskir áhorfendur fylgst með öllu sem gerist á streymisveitunni Viaplay. Auk íslenska landsliðsins verður Viaplay heimili allra annarra landsleikja í Evrópu frá 2022-2028. Kaupin á sýningarrétti frá landsleikjum á vegum Knattspyrnusambands Evrópu koma í kjölfarið á kaupunum á sýningarrétti Meistaradeildar Evrópu, Evrópudeildinni og UEFA Conference League, sem veitir íslenskum áskrifendum Viaplay aðgang að óviðjafnanlegu safni af knattspyrnuleikjum.
Anders Jensen, forstjóri og framkvæmdastjóri NENT Group segir: ,,Þetta er stór áfangi fyrir okkur og sýnir metnað okkar fyrir alþjóðlegri stækkun Viaplay. Þegar við byrjum að sýna frá íþróttum á Viaplay viljum við verða leiðandi íþróttastöð í viðkomandi landi og sú staðreynd að þetta sé í fyrsta sinn sem Knattspyrnusamband Evrópu gerir einkaréttarsamning við streymisveitu undirstrikar hversu metnaðarfull við erum. Réttinum til að sýna frá íslenska landsliðinu fylgir mikil ábyrgð og munum við leita í 30 ára reynslubanka okkar á Norðurlöndunum til að framleiða og bjóða upp á útsendingar frá þessum leikjum með hætti sem ekki hefur sést áður.“
Guy-Laurent Epstein, yfirmaður markaðsmála hjá UEFA segir: ,,Við erum himinlifandi yfir því að hafa náð samkomulagi um frekara langtíma samstarf með NENT, sem mun, á árunum 2022 til 2028, tryggja íslenska landsliðinu og öðrum evrópskum landsliðum heimili á Viaplay. Þar sem NENT hefur víðtæka reynslu í útsendingum frá knattspyrnuleikjum, erum við sannfærð um að stuðningsmenn íslenska landsliðsins muni fá framúrskarandi umfjöllun um leiki Íslands í undankeppni EM í knattspyrnu 2024, HM 2026 og EM 2028 sem og Þjóðadeild Evrópu ásamt úrslitakeppnum Þjóðadeildarinnar 2023, 2025 og 2027 á þeim fjölmörgu áhorfsmöguleikum sem Viaplay býður upp á.”
