„Þetta var verulega ljótt, við höfum séð menn stórslasa sig eftir svona tæklingu,“ sagði Jamie Redknapp, sérfræðingur Sky Sports um brotið sem Jóhann Berg Guðmundsson leikmaður Burnley varð fyrir í gær.
Jóhann Berg lék allan leikinn með Burnley í 0-1 tapi gegn Manchester United í ensku úrvalsdeildinni í gær. Í fyrri hálfleik var Jóhann í baráttu við Luke Shaw, bakvörð Manchester United.
Shaw tæklaði þá boltann en fór að fullum þunga í löpp Jóhanns með takkana á undan sér. Íslenski kantmaðurinn var sárþjáður eftir brotið en gat haldið leik áfram. Shaw fékk gula spjaldið fyrir brotið.
„Luke Shaw andar léttar í klefanum, miðað við hvernig leikurinn er í dag. Hann tekur örlítið af boltanum en síðan fer hann hátt upp og fer í Jóhann,“ sagði Redknapp á Sky Sports eftir leik.
„Í mínum bókum er þetta heimskuleg og stórhættuleg tækling, Shaw má kallast mjög heppinn.“
Gary Neville tók í sama streng á Sky Sports. „Ég held að Luke Shaw sé heppin, hann fylgir í gegn og takkarnir fara í Jóhann. Gult spjald var það besta sem Shaw gat vonast eftir.“