Um tíu þúsund skammtar af bóluefni Pfizer koma hingað til lands á morgun, mánudag. Tekur þá við vandasöm vinna fyrirtækisins Distica við að yfirfara sendinguna og gæta þess að í lagi sé með þessa einstöku vöru, en þar er lykilatriði að hitastig sé rétt. Bóluefnið geymist í miklu frosti.

Fjallað var um málið í hádegisfréttum RÚV. Rætt var við Þórólf Guðnason sóttvarnalækni sem segir komu bólefnis marka nýjan kafla í baráttunni við veiruna – og vonandi lokakaflann.

Mikið hefur verið fjallað um þá óvissu sem ríkir varðandi magn og hraða sendinga á bóluefni hingað til lands á næsta ári. Þórólfur og Kári Stefánsson, forstjóri ÍE, reyna nú hvað þeir geta að fá framleiðandann Pfizer til að hraða sendingum bóluefnis hingað til lands því samflotið með Evrópusambandinu virðist engan veginn duga til að tryggja Íslendingum nægilegt bóluefni á næstunni. Viðræðurnar við Pfizer snúast um að veita framleiðandanum upplýsingar um hvernig til tekst með bólusetningu á heilli þjóð, Íslendingum:

„Við erum að reyna að hraða ferlinu með því að ræða við Pfizer, bæði ég og Kári Stefánsson, við erum að reyna að setja þetta þannig upp að við getum fylgst með á staðaðan máta fylgst með árangri bólusetningarinnar ef við fáum nógu mikið bóluefni til að bólusetja stóran part af þjóðinni. Ef það tekst allt saman þá á okkur að takast að bólusetja þjóðina mjög hratt og fylgjast með því á staðlaðan máta í samvinnu við Pfizer. Það er það sem væru bestu tíðindi sem kæmu, það verður að koma í ljós,“ segir Þórólfur í viðtali við RÚV.