„Ef þessi tvö stóru brot á sóttvarnarlögum sem fjallað hefur verið um í fréttum um jólin verða til hópsmita, þá er það hræðilegt og þyngir enn meira róðurinn fyrir okkur öll,“ segir Sóley Kaldal, sérfræðingur í áhættugreiningum hjá Landhelgisgæslunni, í nýjum pistli á Facebook.
Sóley flutti snemma í faraldrinum frá Bandaríkjunum til Íslands og tók við starfi hjá Landhelgisgæslunni. Helsta ástæða fyrir heimkomu hennar voru slæleg viðbrögð yfirvalda í Bandaríkunum við faraldrinum, en þetta var um miðjan mars.
Í pistli sínum segir Sóley að hafi brot kaþólska söfnuðarins og hópsins í Ásmundarsal ekki valdið hópsmiti þá … „er það eingöngu vegna þess að þetta fólk lét berast á herðum okkar hinna sem höfum hlýtt til hins ýtrasta.“
Í samtali við DV segir hún að jólin hafi verið erfið. „Jólin hafa verið erfið. Ég á foreldra sem eru á áttræðisaldri og ég er sjálf tímabundið í áhættuhópi. Við eigum öll einhverja sögu um fórnir sem við höfum þurft að færa í faraldrinum.“
Sóley segir að þeir sem brutu sóttvarnareglur með þessum sláandi hætti á Þorláksmessu og aðfangadagskvöld hafi umboðslaust tekið það sem hún og aðrir hafa lagt af mörkum til að hefta faraldurinn og notað til að uppfylla sínar augnabliksþarfir:
„Ef þessi tvö stóru brot á sóttvarnarlögum sem fjallað hefur verið um í fréttum um jólin verða til hópsmita, þá er það hræðilegt og þyngir enn meira róðurinn fyrir okkur öll.Ef þeir leiða ekki til hópsmita- þá er það eingöngu vegna þess að þetta fólk lét berast á herðum okkar hinna sem höfum hlítt til hins ýtrasta.Þetta er eins og við værum að berjast við skógarelda og langflestir væru sameinaðir en aðfram komnir við að slökkva eldana á meðan nokkrir sætu með eldspýtur í rjóðri og sprengdu flugelda því þeir væru svo fallegir.Ég færði ekki allar þessar fórnir svo að eitthvað fólk gæti haldið stakt jólapartý og mætt í tiltekna messu. Ég færði þær til að stuðla að lífi og heilsu þjóðar minnar, til að hlífa heilbrigðiskerfinu, velferðarkerfinu, skólakerfinu, fjármálakerfinu, löggæslukerfinu, stjórnkerfinu. Þetta fólk tók umboðslaust allt sem ég hef lagt af mörkum, allt sem þið hafið lagt af mörkum og notaði það til að uppfylla eigin augnabliksþarfir. Það er sárt og hefur stuðað mig meira en ég átti von á.“
https://www.facebook.com/soleykaldal/posts/10158014482148022
