Lögreglan á höfuðborgarsvæðinu hefur sent frá sér stutta tilkynningu þar sem staðfest er að upplýsingar sem sendar eru úr dagbók lögreglu eigi ekki að vera persónugreinanlegar. Segir lögregla að málið verði rannsakað, en tilkynningin er eftirfarandi:

„Vegna fyrirspurna fjölmiðla um tölvupóst sem þeim barst frá embættinu snemma á aðfangadag skal þess getið að vinnureglan er sú að afmá persónugreinanlegar upplýsingar úr dagbók lögreglunnar þegar samantektir úr henni eru sendar hverju sinni. Í samantektinni, sem var send fjölmiðlum á aðfangadag, fórst það fyrir. Ef misbrestur verður á framansögðu er það ávallt skoðað til hlítar.“

Í tilkynningunni sem unnin var upp úr dagbók lögreglu segir að „hæstvirtur ráðherra“ hafi verið á meðal gesta í samkvæmi í Ásmundarsal. Fjölmiðlar áttuðu sig fljótt á því að þetta væri vinnulag sem stingi í stúf við venjur í ritun þessara tilkynninga.

Lesa má úr tilkynningu lögreglunnar að þessar venjur hafi verið brotnar í þetta skipti og viðkomandi aðili sem beri ábyrgð á því muni þurfa að standa fyrir máli sínu. Þess má geta að þessi hluti tilkynningarinnar var með öðru letri en afgangurinn af tilkynningunni á aðfangadagsmorgun, líkt og einhver hefði átt við textann eftir á, án þess að nokkuð verði fullyrt um að svo hafi verið.