Una Guðmunds matarbloggari á unabakstur.is er í hollustuham þessa dagana og við erum að elska það! Þessi holla gulrótakaka kemur skemmtilega á óvart – og þú þarft ekki að fá neitt samviskubit yfir því að dúndra í þig þessu gúmmelaði. Hún er án viðbætts sykurs og er virkilega góð. Sætan er því komin úr döðlunum og er því algjörlega náttúruleg.
Gulrótarkaka
Þessi kaka er rosalega góð og ekki skemmir fyrir að hún er holl eða það er að segja ekki stút full af sykri. Tilvalið að skella í þessa með nýju íslensk gulrótunum sem eru að koma upp þessa dagana og njóta með góðri samvisku.
Innihald :
2 dl Valhnetur
1 dl kasjúhnetur
2 dl gulrætur
1 dl kókosmjöl
8-10 stk döðlur
1 tsk engiferduft
2 tsk sítrónusafi
1 tsk salt
1 tsk kanill
1 peli rjómi
4 msk rjómaostur, við stofuhita
3 msk kókosmjólk
Aðferð:
- Byrjið á því að setja hneturnar og kókosmjölið í matvinnsuvél og blandið saman.
- Takið gulræturnar og rífið þær niður með rifjárni og setjið í matvinnsluvélina ásamt döðlunum, ef döðlurnar eru frekar þurrar er gott að bleyta þær aðeins í vatni áður en þær fara í matvinnsluvélina.
- Því næst er kanil, salti, engiferdufti og sítrónusafa bætt saman við.
- Takið bökunarform, setjið bökunarpappír ofan í það og setjið blönduna ofan á, blandan á að vera svolítið blaut í sér, þrýstið henni vel ofan í formið.
- Þeytið 1 pela rjóma nokkuð vel og bætið rjómaostinum og kókosmjólkinni varlega saman við, ég nota kókosmjólk úr dós og reyni að nota sem minnstan vökva, best að nota þykkasta part kókosmjólkarinnar.
- Leggið kremið yfir kökuna og setjið í frysti í um 4-5 klst áður en hún er borin fram.
- Skerið í fallega bita og skreytið með valhnetum eða gulrótum.
