„Ég ber engan kala til hennar í dag.“ Þetta segir Sigrún Sigurpálsdóttir um Sólrúnu Diego í samtali við DV. Frétt DV þar sem greint var frá rimmu þeirra Sigrúnar og Sólrúnar frá því fyrir ári síðan hefur vakið athygli. Sigrún var viðtalsefni í þættinum Snapparar sem er í umsjón Lóu Pind.

Í þættinum var rifjað upp ósætti sem kom upp á milli Sigrúnar og Sólrúnar en sú síðarnefnda gagnrýndi Sigrúnu fyrir að nota ilmkúlur í þvottavélar sem og að nýta spritt við þrif. Sigrún vill koma því á framfæri að hún beri engan kala til Sólrúnar.

„Þetta lítur kannski út eins og að ég sé að reyna skjóta hana niður út af gömlu máli. Það er alls ekki svo. Ég hef alltaf svarað hreinskilnislega þegar ég er spurð út í þetta en þess á milli hugsa ég ekkert um þetta enda nóg annað að gera. Mér finnst Sólrún vera að gera fullt af flottum hlutum,“ segir Sigrún og bætir við:

„Verst var á sínum tíma að fá aldrei afsökunarbeiðni þar sem börnin mín voru dregin inn í umræðuna út af notkunar spritts við þrif á heimili mínu,“ segir Sigrún en hún og Sólrún ræddust oft við fyrir stóra ilmkúlumálið. Sigrún segir að lokum:

„Síðan er liðið ár og ég er hætt að hugsa um þetta og finnst komið gott af þessu máli, enda mjög kjánalegt allt saman.“