Athafnakonan Manuela Ósk Harðardóttir var að versla í Iceland í Staðarbergi í gærkvöldi. Hún gleymdi kortinu sínu út í bíl og ákvað þá ókunnugur karlmaður að gera góðverk og borga allar vörurnar fyrir hana. Manuela segir frá þessu á Instagram Story.

„Ég var komin með vel fulla körfu,“ segir Manuela. Hún áttaði sig á að hún hafði gleymt kortinu út í bíl eftir að afgreiðslumaðurinn var byrjaður að skanna vörurnar.

„Ég hafði örugglega gleymt því út í bíl og bað um að fá að geyma vörurnar við kassann og sækja kortið,“ segir Manuela.

Það tók Manuelu góðar tíu mínútur að finna kortið.

„Ég fann loksins kortið og hljóp inn í búð og þá var búið að setja allt í poka fyrir mig rosa fínt. Gæinn á kassanum sagði að það væri búið að borga þetta fyrir mig. Og ég bara: „Ha?“ Þá sagði hann mér að gæinn, sem var greinilega á eftir mér í röðinni, hafði bara borgað þessa tíu þúsund króna matarkörfu og skilaði kveðju: „Grímur biður bara að heilsa.“ Það þarf greinilega rosa lítið til því ég er að springa ég er svo glöð og þakklát og mér finnst þetta svo æðislegt og sætt af honum Grími. Og ég auglýsi bara eftir þér, Grímur ef þú ert að fylgja mér á Instagram þá vinsamlegast gefðu þig fram.“

Manuela biður Grím um að senda sér reikningsnúmerið sitt og sýnir verðmæti matarkörfunnar sem var samtals 9.416 krónur.

Leitin að Grími stendur enn yfir og segir ein vinkona Manuelu að Grímur er greinilega efni í framtíðareiginmann.