Mikill titringur er innan raða Vinstri grænna og Sjálfstæðisflokksins en brátt liggur fyrir hvort þessir flokkar fari í sitt fyrsta ríkisstjórnarsamstarf. Ekki er vitað hversu marga þingmenn VG munu hafa en bæði Rósa Björk Brynjólfsdóttir og Andrés Ingi Jónsson munu ekki taka afstöðu til samstarfsins með Sjálfstæðisflokknum og Framsóknarflokknum á flokksráðsfundi VG í dag. Þau hafa bæði haft uppi efasemdir um væntanlegt ríkisstjórnarsamstarf og hefur Eyjan heimildir fyrir því að þau hafi ekki fengið jafn miklar upplýsingar um gang viðræðnanna og aðrir þingmenn VG.
Fréttablaðið greinir frá því í dag að Jón Gunnarsson samgönguráðherra berjist nú fyrir lífi sínu á ráðherrastól við Kristján Þór Júlíusson menntamálaráðherra. Talið er líklegt að aðrir ráðherrar Sjálfstæðisflokksins haldi áfram en hvorki Páll Magnússon oddviti í Suðurkjördæmi né Áslaug Arna Sigurbjörnsdóttir varaformaður Sjálfstæðisflokksins fái ráðherraembætti. Jón Gunnarsson hefur þó ólíkt Kristjáni Þór lagt fram frumvörp á síðasta ári, en Kristján Þór hefur sterka stöðu sem oddviti flokksins í Norðausturkjördæmi.