Lögreglan á höfuðborgarsvæðinu greinir frá því í nýrri tilkynningu að hún hafi verið kvödd að húsi vegna mikils hávaða. Óttast var að verið væri að beita ofbeldi. Segir í tilkynningunni að lögreglan hafi barið valdsmannslega að dyrum en til dyra hafi komið nakinn maður. Þegar maðurinn var spurður hvort hann væri einn kvað hann nei við og birtist þá nakin kona.

„Ekki var að sjá að neitt amaði að henni og þvert á móti virtist hún vera alsæl. Aðspurð um hávaðann sögðust þau hafa verið að stunda kynlíf og játuðu að því hefði fylgt nokkur hávaði. Ekki þótti ástæða til að leggja frekari spurningar fyrir skötuhjúin, en greinilegt var að þeim þótti koma lögreglunnar heldur vandræðaleg. Þau voru kvödd við svo búið og vinsamlegast beðin um að hafa lægra við iðju sína í húsinu og tóku skötuhjúin vel í tilmælin,“ segir enn fremur í tilkynningunni.