Rúnar Eff Rúnarsson og hljómsveit hans, sem Valgarður Óli Ómarsson, Hallgrímur Jónas Ómarsson, Reynir Snær Magnússon og Stefán Gunnarsson skipa, hafa undanfarið ferðast um Tennesse og Texas, þar sem þeir stoppuðu í Nashville, Memphis, Austin, Houston og Jefferson.
Í Jefferson tóku þeir þátt í Texas Sounds International Country Music Awards, sem er tónlistarhátíð með tónlistarfólki héðan og þaðan úr heiminum.
Kántríhljómsveitir frá 13 löndum: Ísland, Svíþjóð, Króatía, Mexíkó, Suður-Afríka, Swaziland, Slóvakia, USA, Írland, Bahamas, Ítalía, Nýja Sjáland og Spánn, voru tilnefndar til verðlauna og komu fram á hátíðinni. Hátíðin fór fram á þremur kvöldum þar sem allar hljómsveitirnar komu fram. Gerðu Rúnar Eff og félagar sér lítið fyrir og unnu til tvennra verðlauna: söngvari ársins og hjómsveit ársins.
„Jahá. Þetta bara gerðist, Male Vocalist of the year & Band of the year á Texas sounds international country music awards. Staðfesti bara það sem ég vissi fyrir, að ég er með fáránlega gott band með mér.
Takk strákar! Fer sáttur að sofa í kvöld:),“ skrifar Rúnar á Facebooksíðu sína, að vonum ánægður með verðlaunin.
Bleikt.is óskar þeim félögum innilega til hamingju.
Rúnar Eff tók þátt í Söngvakeppni sjónvarpsins í vor þar sem hann lenti í sjötta sæti með lag sitt, Mér við hlið (Make Your Way Back Home).
