Hanna Lára Helgadóttir, réttargæslumaður foreldra og bróður Birnu Brjánsdóttur, var harðorða í garð fjölmiðla í málflutningi sínum við aðalmeðferð í máli Thomasar Møller Olsen, sem er sakaður um að hafa myrt Birnu.
Hanna sagði að báðir foreldrar hennar séu með áfallastreitu á háu stigi eftir atvikið. Það sé byggt á vottorðum sálfræðinga og presta. Þau fara fram á rúmar 10 milljónir í miskabætur til hvors aðila. Hún sagði jafnframt að ókunnir einstaklingar hafi bankað upp á hjá fjölskyldu Birnu og sagt þeim frá vandræðum sínum.
„Foreldrar hennar hafa átt erfitt með að komast fram úr rúmi. Bróðir Birnu hefur einnig átt mjög erfitt sem foreldrarnir finna mikið fyrir. Beinar útsendingar réttarhaldanna hafa aukið á streitu foreldranna. Faðir hennar situr hér í réttarsal umkringdur fjölmiðlafólki sem lýsir atvikum í beinni útsendingu. Sumir fjölmiðlar hafa farið offari í fyrirsögnum og málslýsingum,“ sagði Hanna Lára.
Hún sagði ennfremur að Birna hafi verið sólargeislinn í lífi foreldra sinna. „Birna var lífsglöð stúlka sem alltaf var hægt ná í. Birna var náin fjölskyldu sinni og hún var sólargeisli í lífi foreldra sinna,“ sagði Hanna Lára.